《小傳日記》外圍未再有特別利好消息，缸友個個等緊大象（００００５）派季績同埋觀望
祖國過兩日公布嘅通脹數據，大家都估計個市未必咁易可以上返２３０００關口。魚缸初段的確
係受制於呢個心理關口位，不過午市之後好友開始嘗試淡友嘅底線，２３０００一躍升破，最終
更以接近全日最高位收市，收報２３０４７，升１３２點；國貨指數就升１１３點收報
１１１１５。
魚缸成交未算活躍，不過總算係一步一步咁上升緊，埋單有５６７億銀。市況其實早已傾向
好友，大家未肯食呢餐「大茶飯」，主要都係要等多啲證據證明可以打贏仗。大象啱啱公布份靚
靚季績，會唔會係最強勁嘅武器呢？
＊大象季績佳明天要搶貨？內銀輕踏前中銀靚爆鏡＊
魚缸雖然係突破咗兩萬三，不過今日大隻佬都無乜主題好炒作，全部股份都係自由活動。創
紀錄新高嘅股份有兩隻，分別係友邦（０１２９９）同埋九倉（００００４），兩隻股份今日分
別升咗２﹒２巴仙及０﹒６巴仙。
大象（００００５）今日窄幅上落，高低位計只係５毫子，收市微漲０﹒２巴仙。收市後佢
地公布第一季稅前盈利有８４億美金，高過預期中值，估計明日會繼續有得炒高。小象
（０００１１）亦都會派季績，收市微跌０﹒２巴仙。最靚銀號係中銀香江（０２３８８），以
全日最高位兼一年新高２７﹒６銀收市，足足升２﹒４巴仙。
缸邊就傳話四大行嘅４月新增貸款只係得２４５０億人仔，少過３月一大截，主要係存款按
月減少１３４０億令到放貸投放減慢。四大行今日股價無乜大影響，工行（０１３９８）漲
０﹒９巴仙，建行（００９３９）、中行（０３９８８）同農行（０１２８８）漲０﹒６至
０﹒８巴仙。 |
發表於 2013-5-8 08:57
| 
1299
